ياللي غيابك طال وبحقي اخطيت
هذا شهر ما اشوف للوصل نيـــــــــة

هن كانت اسبوعين لكن تماديت
في غيبتك كنك تنفذ وصيــــــــــــــــة

لعبت باعصابي ولا قلت مليت
لا راح يوم اقول باكر مجيــــــــــــــــــــة

عانيت بغيابــــــك انا حيل عانيت
يابغضني للبعد يا رحم حيـــــــــــــــــه

عقبك مشاويري من البيت للبيت
اخاف لا دقيت ماني هنيـــــــــــــــــه

الله ياني فــــــــــــــــي غيابك تحريت
اثر المفارق صعب ماهو شويــــــــــــه

هذا شهر وش عاد لو انك ابطيت
والله لتلقى لك هنيا ضحيـــــــــــــــة

البارحة مابين يمكــــــــــــــــــــن ويا ليت
وابليس يتركني ويرجع عليــــــــــــــــــــه

فكرت لو طـــــــول غيابك ولاجيت
يعني كذا روحه ومن غير جيــــــــــــه

خانتني الدمعة وطاحت وصــــديت
ملعون ابو التفكير يذبح خويـــــــــــــــة